الأسئلة الشائعة




وشو موقع "أكل بيت"؟

موقع (أكل بيت) على الإنترنت هو عبارة عن منصة إلكترونية تربط ما بين الطباخين و الطباخات اللي يشتغلون من بيوتهم مع عملائهم.

يعني .. موقع (أكل بيت) على الإنترنت مايبيع لكم الاكل ولا يتدخل بأي شكل من الأشكال في انتاج أو تصنيع أو إعداد أي اكل من اللي يتم بيعه في الموقع، موقعنا فقط مثل حلقة الوصل بين الطباخات والطباخين وبين العملاء , فـ هو يسهل عليك انت يالعميل إمكانية البحث والعثور على المطابخ المحلية المشتركة في الموقع، اللي تقوم بتوفير وتوصيل الطعام إلى عنوانك ويمكنك من الطلب من خلاله. وانت يالمطبخ بدال ماتكون متشتت بين واتس اب وانستقرام وتويتر ومكالمات "اكل بيت" راح ينظم شغلك وطلباتك ويخليها في مكان واحد مرتبة ويوفر جهدك ووقتك ويسهل عليك ادارة شغلك و التركيز على الطبخ والتفوق فيه .




انا عندي مطبخ كيف اقدر اسجل في الموقع ؟ ووش المطلوب مني ؟

ك فوق كلمة تسجيل, تعبي الخانات المطلوبة وتسجل كمستخدم عادي بعدين بتلاقي فوق كلمة (اضافة مطبخ) تضغط عليها و تضيف معلومات و بعدها اضغط حفظ ومبروك عليك صرت احد مطابخ اكل بيت

اما المطلوب منك شي واحد : الاهتمام والتركيز على الجودة ثم الجودة ثم الجودة الله الله بالطبخ السنع , و مانوصيك على الالتزام مع العملاء بالمواعيد, بيضوا وجيهنا تكفون




كيف احمل صور طبخاتي؟

سهلة, روح لاضافة وجبة, و بعدما تكتب معلومات الوجبة, تقدر تحمل الصورة عن طريق اختيار الصورة من استديو الصور اللي عندك بالجوالاو عن طريق اضافة الصورة من صورك اللي في حسابك على الانستقرام 
وعلى فكرة ترى تقدر تضيف اكثر من صورة للطبخة الوحدة.




انا كمطبخ وش بستفيد اذا سجلت بموقعكم؟

اول شي راح نرتب وننظم طلباتك وشغلك بدال ماتتشتت بين التطبيقات والمنصات من انستقرام للواتس اب للفيس بوك وتويتر حنا بنجمع كل شغلك بمكان واحد, بالاضافة الى اننا بنكفيك عناء التسويق ونسهل عليك الوصول للعملاء و راح نهتم بصورتك كمطبخ و نساعدك في تقديم براندك بأفضل صورة ونكون لك سند وعون في تطوير عملك ونجاحك .




ووين الاقي الطلبات اللي بتجي على مطبخي ؟ اذا جاني ايميل او مسج بالطلب وين الاقيه في الموقع؟

تلقاه الله يسلمك في خانة متابعة الطلبات




انا ابي اطلب من موقعكم بس مالي خلق اسجل صراحة مشوااار , اقدر اطلب بدون تسجيل؟

تقدر تفرج و تختار اللي تبي و لااوصيك عب السلة و في الاخير اذا جزمت وقررت تشتري بتجيك صفحة التسجيل وترى كلها اربع خانات ماتحتاج منك الا اسمك وايميلك ورقمك ماراح تاخذ من وقتك شي, خل عنك ضعافة النفس .




اقدر احط لي اكثر من عنوان؟

طبعا, تقدر تحط بيتكم و دوامك و استراحة العيال واستراحة زملاء العمل و استراحة الانسبا والمزيد والمزيد من الاستراحات




وانا اتفرج على الوجبات جيت بقيّم وجبة ولا قدرت ! خير ليش؟

التقييم يكون مفعل لك بعدما تطلب الوجبة نفسها وتجربها صدق, اما انك تقيم من ذا والطريق لا, شغل الانستقرام وتجميع اللايكات والشللية موب عندنا, مايمديكم على المستوى المتناهي من المصداقية عندنا *_^




دخلت على طلباتي و فيه طلب طالع لي مرفوض ! وش السالفة؟

اكيد الوقت او ساعات العمل للمطبخ مو متوافقة مع طلبك او المطبخ مشغول او مقفل , يمكن مخلص الزيت عندهم
شيك بعد فترة و بتلقاه متاح ان شاءالله




كتبت اسمي و كلمة السر غلط وتقفل حسابي وش اسوي؟

اضغط على اعادة تعيين كلمة المرور و تنرسل على ايميلك و كلها دقايق ويضبط معك ان شاءالله, و انت عاد لا تسوي تسجيل خروج كل شوي, خلك دايم مسجل و ريح راسك .




انا سويت طلب وماجاني لا ايميل ولا رسالة على جوالي ؟

شيك على الجنك ميل (البريد المهمل) و راح تلقاه, اما الجوال تأكد انك مو مقفل خاصية الرسائل الدعائية, اذا مقفلها لازم تفتحها عشان يوصلك المسج .




وين الاقي طلباتي في الموقع؟

اللي لسى ماتممت عملية الشراء فيها بتلقاها في السلة اما اللي تممت عملية شرائها تلقاها ياطويل العمر في خانة الطلبات




متى يوصل الطلب؟ ذبحني الجوع

كل مطبخ يختلف في اوقات اعداد الطلب و ايصاله ف شيك على الصفحة الخاصة بالمطبخ بتلقى فيها كل التفاصيل وبتعرف متى بيوصل طلبك يابو بطنين :P




بالنسبة للدفع, كيف احاسب على طلبي؟

تتواصل مع المطبخ بخصوص الدفع وحاليا الدفع كاش عند الاستلام هو اللي متوفر




طيب واذا طلبت من اكثر من مطبخ كيف احاسبهم و كيف ادفع لهم؟

كل مطبخ تدفع له لحاله, وحتى اتمام عملية الشراء والطلب تكون لكل مطبخ لحاله




طيب انا يالعميل اذا طلبت وماجاز لي الاكل والا تسممت والا جاني شي؟ من المسؤول؟

المطابخ اللي تشوفها بموقعنا مسئولة بمفردها عن الالتزام بالقوانين واللوائح والانظمة والمقاييس والمعايير المطبقة في الدولة مثل اللي تتعلق بإعداد و بتحضير وبيع وتسويق وسلامة الطعام . يعني اذا جاك شي ترى مالنا دخل 😅 . و ان شاء الله موب جايك شي , حنا بس نوضح لك ان اي مشكلة في نوعية او جودة او كمية الاكل او حتى وقت وصوله مو مننا ابدا .




يعني وش يضمن لي الاكل وجودته ومكوناته؟

موقع (أكل بيت) مايقدر يضمن لك بأي شكل ان المطابخ منتجاتها و مكونات و نوعية الطعام معتمده أو أن المطبخ يلتزم بالقوانين واللوائح المعمول بها لتحضير الطعام لان هذي مسئولية المطبخ اللي يسوي الاكل و ان شاء الله انهم كويسين وكلهم خير وبركة. بس انت اذا جيت تشتري خلك مفتّح مو تطير عيونك في ذا العيشة وتطلب على عماك .. ركز و اقرا كل المعلومات المقدمة من المطابخ على الموقع أو اذا عندك طلب خاص اسأل و اعرف كل شي عن المطبخ اللي بتشتري منه من حيث المكونات و نوعية الطعام وموثوقية المطبخ، وشوف مدى التزامه بالقوانين والنظافة, يعني اذا شفت صحون تروع وشغل برابيس اطلق ساقيك للريح ترى الموقع مليان مطابخ .




ماش كلامكم يخوف ! وشلون كذا ؟

عاد لا ترتاعون .. ترى والله نبيلكم الزين وودنا انكم تكونون راضين عن كل الاكل اللي تطلبونه بس عشان ماندخل في سين وجيم وعشان ماتجينا صحون طائرة وحافظات تتساقط على رؤوسنا من السماء حبينا نوضح لكم ان موقع (أكل بيت) ما يضمن بأي طريقة كانت نوعية أي اكل وجودته، أو أن الأغذية غير متوافقة مع القوانين واللوائح المعمول بها، وبرضو فيه شغله بنقولها بس لاتكرهونا , ترى حتى مانقدر نضمن لكم ان الاكل اللي بيوصلكم هو نفس اللي موجود في الصورة لان الصور يتم رفعها من المطبخ نفسه يعني مو حنا اللي نحطها وماهي من اختصاصنا . وانت بعد شاري الاكل تاكله والا تصور معه اهم شي الطعم على قولة حمود الخضر "فتلك مظاهر" لا لا لا نحتاج الـ .. احم احم, ايوة وين وصلنا ..




لو طلبت 7 صياني حلى وجاني سكر من المسؤول ؟ والا طلبت ورق عنب وماطلع ناطع؟

موقع (أكل بيت) لن يكون ملزم او مسؤول عن أي طعام او خدمات مقدمة من المطابخ التي تكون غير صحية، وتتسبب في الاصابة أو تكون غير مقبولة للمشترين، أو التي لا تلبي توقعات المشترين بأي طريقة. (مدري ليش حسيت مع هالجملة لازم انفخ واقولها بالفصحى)




وش فايدتكم اجل ؟ يعني اذا ماكنت راضي عن الاكل او صار معي مشكلة من اتواصل معه ؟ مع المطبخ اللي شريت منه والا مع موقع اكل بيت؟

تواصل مع المطبخ ووضح لهم سبب عدم رضاك او المشكلة اللي واجهتك و ان شاءالله بيتجاوبون معك, اذا ما لقيت تجاوب او ماانحلت المشكلة تواصل معنا ومالك الا اللي يرضيك, و مانوصيك حط حيلك فيه بالتقييم, شلّخه وقل كل اللي بقلبك في التقييم, و احنا في الموقع دايم نشيك على التقييم بشكل دوري ومستمر و اي مطبخ نشوف عليه ملاحظات و تقييم سلبي نتواصل معه و اذا تأكدنا انه فعلا ما التزم بالجودة وبمعايير "اكل بيت" بنشوته من موقعنا فوراً .




ارسلت لكم ايميل ومارديتوا علي يالنصابين ؟

اعذرنا, اكيد مزحومين, بس ولا يهمك اذا ماردينا بالايميل تواصل معنا على تويتر و ابد ابشر باللي يسرك




طلبت اكل من اسبوع وما وصل للحين ؟ وين طلبي؟

تأكدوا من عناوينكم الله يعطيكم العافية , عشان يوصلك الطلب في وقته ومايصير فيه اي لخبطة او تأخير, ماله داعي يروح جريشك لبيت حمولتك بالغلط 😅 مو تجين تقولين (اكل بيت) كبوا عشاي . مع العلم بأن المطبخ اللي بتطلب منه بيشد حيله وبياخذ كافة الوسائل الممكنة اللي تخليه يوفي بوقت التوصيل المحدد، ومع ذلك ممكن يتأثر وقت التوصيل بعوامل خارج سيطرته ومايحتاج نشرحلكم, انتم عارفين الزحمات عندنا . وراح نلبس درع واقي من الرصاص ونجي نبلغكم في حالة علمنا بأي تأخير غير متوقع .




وش فايدة سياسة العملاء اللي سويت عليها موافق بدون مااقرا كالعادة؟

دامك جيت برجليك تعال هنا, ارفع يدك و ردد معي المطبخ أو العميل المسجل في موقع "أكل بيت" يتعهد بصحة و دقة المعلومات التي تم إدخالها و إستخدامها في عملية التسجيل، و أنه هو/هي المسؤول/ة عن أي أضرار قد تنتج بسبب عدم صحة هذه المعلومات.

يتعهد المطبخ أو العميل المسجل في موقع "أكل بيت" بأن كافة المراسلات أو العناوين أو الأسماء المستعارة بألا تكون مخالفة للوائح والآداب العامة والسلوك الحسن والقوانين. ويلتزم بعدم مضايقة و/أو تهديد المستخدمين/العملاء الآخرين. ( نظام شات القلوب مانبي )

يتعهد المطبخ أو العميل المسجل في موقع "أكل بيت" بعدم استخدام خدمات "أكل بيت" لأي أغراض تجارية أو إعلانية بدون الحصول على موافقة "أكل بيت". ( ترى عندنا محامي وبنجرك من علباك )




طيب من اللي يضيف الطبخات والمكونات والوصفات والصور والاشياء المكتوبه على الموقع؟

المطبخ يعتبر مسؤولاً عن أي بيانات، وصفات، شرح للطبخات، و صور الوجبات التي يتم تحميلها لموقع "أكل بيت"، و يقر المطبخ بأن موقع "أكل بيت" غير مسؤول بتاتاً بأي شكل من الأشكال عن تلك الملفات أو الصور أو وصف الوجبات. << شفتو

يتعهد المطبخ أو العميل المسجل في موقع "أكل بيت" بعدم ارسال أي رسائل تكون تهديدية أو ذات مغزى سياسي، أو غير أخلاقية، أو عنصرية أو مناقضة لقوانين المملكة العربية السعودية والاتفاقيات الدولية. ( برضو المحامي حقنا بيجرك من علباك)

يتعهد المطبخ أو العميل المسجل في موقع "أكل بيت" بعدم ارسال أي معلومات بالبريد الإلكتروني تكون محظورة قانونيا أو توزيع أي رسائل غير معتمد ارسالها مثل رسائل البريد المتسلسلة والبرامج الضارة الخ، وعدم تسجيل واساءة استخدام أي معلومات شخصية عائدة الى الاخرين. ان العضو نفسه (مطبخ أو عميل) مسؤول عن كافة انواع التصرفات التي يتم القيام بها تحت اسم "المستخدم".




عجبتني كم وصفة وودي انسخها منكم و انزلها في الانستقرام واكشخ على متابعيني, عادي؟

ويتعين على الاعضاء وعدم استخدام الموقع لأغراض غير قانونية، وعدم ارتكاب أي تصرفات مخالفة على الموقع او فيما يخص المحتوى على الموقع، وعدم استخدام الموقع للقيام بأي انشطة تجارية غير الاستخدام المصرح له لخدمات "أكل بيت" ، وعدم نسخ أي محتوى، بما في ذلك وبدون حصر محتوى قوائم المطابخ ومراجعات/تقييم الغير، لإعادة النشر بشكل مطبوع او عبر الانترنت، وعدم انشاء مراجعات المطابخ و الوجبات او تسجيل أي ادخالات لصالح او مع أي غرض تجاري او غرض اخر او قصد لا يتفق بنية حسنة مع غرض إنشاء الموقع، وعدم محاولة الحصول على حرية دخول غير مصرح بها الى انظمة كمبيوتر الاخرين من او عن طريق الموقع وعدم التدخل في استخدام شخص آخر أو جهات أخرى للموقع ، وعدم تحميل او نقل الفيروسات او الملفات الضارة والتخريبية او التدميرية الاخرى.




كنت جوعااااان\ة وطلبت الموقع كله بعدين سويت اندومي وشبعت, اقدر اكنسل الطلب و ألغيه ؟

- يحق لك تلغي الطلب قبل ما يوافق المطبخ عليه ، بعد موافقة المطبخ لازم تتواصل مع المطبخ لإلغاء الطلب

- "أكل بيت" يحتفظ بحق إلغاء أي طلب يحتوي على معلومات غير صحيحة. تكتب غلط بتروح عليك الوجبة, ايييه مافيه تفاهم

- يحق للمطبخ إلغاء الطلب بعد استلامك رسالة التأكيد بإرساله الى المطبخ. ويحتفظ "أكل بيت" و المطابخ المشتركة معه بحق إلغاء أي طلب قبل أو بعد القبول، وسوف نقوم بإبلاغك فوراً بأي إلغاء مذكور. احيانا نصير نفسية , كيفنا !




كيف يوصلني الطلب؟ بسرعة تراني جوعااان\ة

- يتم توصيل الطلبات عن طريق المطبخ مباشرة أو مندوب توصيل يتعامل مع المطبخ المسجل في موقع "أكل بيت"

- على فكرة , ترى تقدر تختار خاصية "إستلام من المطبخ" أثناء تقديم الطلب عشان تستلم الطلب حقك من مكان المطبخ أو أي نقطة قريبة منه وتوفر على نفسك التوصيل .

- موقع "أكل بيت" و المطابخ المسجلة لا تتحمل أي مسؤولية في تأخر وصول الطلبات أو أضرار أو خسائر أو مبالغ إضافية قد تنتج من التأخر في التسليم .

- يجب على العميل التأكد من وقت تسليم الطعام و تحديد المكان و الوقت المناسب لضمان توصيل الطلب و ذلك يعني عدم مسؤولية "أكل بيت" أو المطبخ عن اي ضرر او تكلفة اضافية لإيصال الطلب كنتيجة لعدم وضوح تعليمات التسليم و عدم كفاية الترتيبات . 




انا مابي احد يدري اني مسجل\ة عندكم, خاصة بيت عماني الملاقيف, شلون؟

حطينا لكم في موقع (اكل بيت) سياسة تحفظ خصوصيتكم ماتخرّش الميّة على قولتهم, لان يهمنا بالدرجة الاولى التزامنا لزوارنا و عملائنا بحفاظنا على خصوصيتهم الكاملة، وعدم انتهاكنا لأي أمر من شأنه الإخلال بخصوصيتهم. يعني مايحتاج تقول لنا العبارة المشهورة (لحد يدري), منصة (أكل بيت) تقوم بجمع معلومات عن الزائرين/العملاء بطريقتين:

المعلومات التي يتم جمعها آلياً (الكوكيز) << هذا شي آلي مو تروحون تاكلونه بعد !

البيانات التي يقوم الزائر/العميل بتعبئتها من تلقاء نفسه




وشوله تجمعون عني معلومات ؟ تعرفون عماني انتم؟

تقوم منصة (أكل بيت) باستخدام تكنولوجيا الكوكيز (الغير صالح للاكل) لتجميع معلومات بشكل آلي عن الزائرين/العملاء مثل وقت الزيارة والدولة اللي جاي منها، وكذلك المكان الذي أتى من خلاله لمنصة (أكل بيت) يعني تويتر انستقرام موقع والا ايميل الخ، إضافة إلى نوع المتصفح الخاص بالزائر/العميل ونظام التشغيل الخاص به, يعني حقين الويندوز والاندرويد مافيه اكل (نمزح) 😙 ومثل هذه المعلومات نستخدمها في تحسين مستوى الخدمة المقدمة لزوارنا/عملائنا، وتقديم المحتوى المناسب لهم عشان مايعلق عندكم الموقع و الحركات الجميلة اللي دايم تصير بسبب المتصفحات والانظمة .




طيب فيه احد غيركم بيعرف هالمعلومات عني؟ تخبرون انا ثروة قومية ويجب معاملة معلوماتي البسيطة معاملة الاسرار الحربية

النماذج التي يتم تعبئتها بواسطة زوار/عملاء منصة (أكل بيت) بشكل اختياري مثل نموذج التسجيل، ونموذج الاتصال بنا، ويقوم الزوار/العملاء في هذه النماذج بتعبئة معلومات خاصة بهم مثل الاسم والبريد الالكتروني وغيرها، وتستخدم هذه المعلومات للتواصل مع الزائر/العميل والإجابة عليه ونحو ذلك. ولا يتم تحت أي حال من الأحوال تقديم هذه المعلومات أو بيعها لطرف ثالث (ارقد و آمن) إلا في حال ورود طلب قضائي يستوجب كشف مثل هذه البيانات (محد قالك تجيب الطعة). رغم ذلك، قد يتم كشف معلومات عامة للمعلنين لدينا أو لمعلومات و فعاليات خاصة و إحصائية مثل عدد الزوار يومياً ومعدل تصفح الصفحات في المنصة وغيرها من المعلومات الإحصائية والتي لا تضر بخصوصية زوارنا/عملائنا. يعني ماتضركم بس تزيد قروشنا (قمة الشفافية) 😁




تضمنون لي ان معلوماتي عندكم في امان؟

تقوم منصة (أكل بيت) بعدة وسائل لضمان أمن معلومات المستخدمين/العملاء وعدم ضياعها أو تسريبها، وذلك مثل عدم السماح إلا لعدد محدود وموثوق من المشرفين المخولين بالاطلاع على هذا البيانات والموافقين على سريتها. سركم في بير عميق مافيه الا 3, 4 من المشرفين بس 😛





فتحت رابط عن طريق موقعكم وخايف انهم خذوا معلومات عني, وش اسوي؟

قد تحتوي منصة (أكل بيت) على وصلات لمواقع أخرى خارجية، و منصة (أكل بيت) ليست مسؤولة عن محتوى تلك المواقع أو عن سياسة خصوصيتها (نرجع ونقول فتّحوا وانتبهوا) . وكذلك تقوم منصة (أكل بيت) باستخدام مواقع تقوم بتتبع وتعقب وتحليل إحصائيات الزوار/العملاء نسويلكم تعداد سكاني وندعي ان الله يكثركم 😁، و منصة (أكل بيت) ليست مسؤولة عن سياسة خصوصية تلك المواقع، أو عن طريقة تجميعها للمعلومات، وبزيارتك لمنصة (أكل بيت)، فإنك تقر بأحقية منصة (أكل بيت) في استخدام هذه الخدمات، وكذلك توافق على إخلاء مسؤولية منصة (أكل بيت) من عمل هذه المواقع.




انا في التسجيل حطيت ايميل خربوطي, مابي احط ايميلي وتزعجوني بايميلاتكم واعلاناتكم, عادي؟

حط ايميلك الصدقي واسمع, تقوم منصة (أكل بيت) بإرسال رسائل بريدية منوعة لمستخدميها بشكل دوري، وباستخدامك لمنصة (أكل بيت)، فإنك توافق على استلام هذه الرسائل, دقيقة دقيقة لاتروح تشيل ايميلك من الموقع .. ترانا والله مو غثيثين , ماراح نزعجكم بالايميلات والرسايل مثل بعض الناس 😛 ، وحتى تسويقنا خفيف طينة, ومانزعج المستخدمين/العملاء/الزوار ابد لأن زي ماقلنا لكم ألزم ماعلينا خصوصيتكم، وعشان تصدقون اننا نحترم حريتكم ترى موقع (أكل بيت) في أسفل كل رسالة حاطين لكم رابط خاص للي يرغب في إلغاء اشتراكه، وفي حالة وجود أي شكوى على خدمة الرسائل والا احد غثكم منا والا منا، ابد ارسلوها لنا على هالبريد الالكتروني customer@akilbayt.com وحنا نشوف شغلنا معه ومايصير خاطركم الا طيب